स्व जनगणना पोर्टल म छत्तीसगढ़ी ल शामिल करें बर कलेक्टर ल सौपे गीस ज्ञापन…..

छत्तीसगढ़ी भासा बर आर-पार के लड़ाई: “हमर भासा-हमर पहिचान”, जनगणना म स्थान नी मिलिस त होही उग्र आंदोलन*

*छत्तीसगढ़ी भासा ल संविधान के 8वी अनुसूची म सामिल करे बर व्यापक रूप से चलाए जाही जबर चिठ्ठी अभियान प्रधानमंत्री जी ल लिखे जाही पत्र*

NOW HINDUSTAN. -छत्तीसगढ़ी अस्मिता और महतारी भासा के मान-सम्मान बर आज कोरबा के धरती म एक नवा इतिहास रचे गिस। *जोहार छत्तीसगढ़ पार्टी (JCP)* अउ *छत्तीसगढ़िया क्रान्ति सेना* ह संयुक्त रूप ले हुंकार भरत, सैंकड़ों कार्यकर्ता मन के संग रैली निकाल के कलेक्टर महोदय ला भारत सरकार के नाम ज्ञापन सउंपिन। दुनो संगठन मन के एकच मांग हे—

“आगामी 2026-27 के जनगणना म छत्तीसगढ़ी भासा ला अनिवार्य रूप ले शामिल करे जाय।”

**अस्मिता के सवाल: विदेशी भासा ला जगह, फेर “राजभासा” उपेक्षित?

ज्ञापन सउंपत जोहार छत्तीसगढ़ पार्टी के जिला अध्यक्ष जैनेन्द्र कुर्रे अउ छत्तीसगढ़िया क्रान्ति सेना के जिला अध्यक्ष सुरजीत सोनी ह स्पष्ट कहिन कि छत्तीसगढ़ी भासा ह सिरिफ़ एक बोली नई हे, ये ह 3.5 करोड़ छत्तीसगढ़िया मन के प्राण हे।

संगठन मन ह कड़ा आपत्ति जतावत कहिन कि:

* स्व-जनगणना पोर्टल म नेपाली जइसे विदेशी भासा अउ अंग्रेजी ला जगा दे गे हे जबकि अंग्रेजी हर हमर भारतीय संविधान के 8वी अनुसूची म दर्ज घला नई हे, फेर छत्तीसगढ़ के राजभासा “छत्तीसगढ़ी” ला दरकिनार कर दे गे हे।

* छत्तीसगढ़ी के व्याकरण हिंदी ले घलो पहिली (सन 1885/1890) म रचे जा चुके हे, फेर आज घलो एकर उपेक्षा भासा के अपमान हे।

* सिंधी, संस्कृत अउ नेपाली भासा बोलेइया मन ले कतको गुना जादा जनसंख्या छत्तीसगढ़ी भासा भाषी मन के हे।

*उग्र आंदोलन अउ जनगणना बहिष्कार के चेतावनी*

दुनो संगठन मन ह शासन-प्रशासन ला चेतावत कहिन कि यदि जनगणना 2026-27 म छत्तीसगढ़ी भासा ला जगा नई मिलिस, त पूरा प्रदेश म **जनगणना के बहिष्कार** करे जाही। ये लड़ाई अब अस्मिता के लड़ाई बन चुके हे। छत्तीसगढ़िया मन अब अपन भासा के उपेक्षा बर चुप नई बईठय, जरूरत पड़िस त उग्र प्रदर्शन घलो करे जाही जेकर जिम्मेदार स्वयं शासन-प्रशासन होही।

*इनखर मनके रहिस गरिमामयी उपस्थिति*

ये ऐतिहासिक रैली अउ ज्ञापन कार्यक्रम म मुख्य रूप ले जोहार छत्तीसगढ़ पार्टी के जिलाध्यक्ष जैनेन्द्र कुर्रे अउ छ्त्तीसगढ़िया क्रान्ति सेना के जिलाध्यक्ष सुरजीत सोनी सहित जेसीपी जिला सचिव  डॉ. महावीर यादव (मानद), जिला संगठन मंत्री सुरेश पटेल, जिला मंत्री नोभीत साहू, जिला मंत्री देवहंस, कोरबा शहर अध्यक्ष हरि चौहान, महिला जिला अध्यक्ष चंचल महंत अउ छत्तीसगढ़िया क्रान्ति सेना के जिला संगठन मंत्री ओम केवट, जिला उपाध्यक्ष राकेश यादव, जिला महामंत्री राकेश सूर्यवंशी समेत जिला भर के जम्मो खंड के सैंकड़ों जुझारू सेनानी पदाधिकारी मन अपन भासा अउ माटी बर डटे रहिन।