NOW HINDUSTAN. Korba. छत्तीसगढ़ी राजभाषा परिषद दुवारा शुरू करे गये अभियान छत्तीसगढ़ी ल आठवीं अनुसूची म शामिल करे बर हस्ताक्षर अभियान म छत्तीसगढ़ के पर्यटन नगरी मल्हार जिहाँ विश्व प्रसिद्ध मां डिडनेश्वरी देवी मंदिर हवय ओकर परिसर म आयोजित सम्मान, विचार अउ काव्य संगोष्ठी के आयोजन सम्पन्न होइस। आयोजन के माई पहुना वरिष्ठ साहित्यकार डॉ राघवेंद्र कुमार दुबे पगरइत पं. राजेश पांडेय, अंजनी तिवारी सुधाकर अउ संजीव पांडेय के खास। पहुनाई म संपन्न होइस। ए मउका म परिषद के प्रांतीय अध्यक्ष डॉ विवेक तिवारी दुवारा ओमप्रकाश पांडेय, संजीव पांडेय, पं. राजेश पांडेय, दिलीप पांडेय, जतन केवट अउ दिनेश पांडेय ल सम्मानित करे गइस अउ परिसर म उपस्थित जम्मोझन के हस्ताक्षर लेहे गइस।
ए मउका म पहुना मन कहिन के छत्तीसगढ़ी ल संविधान के आठवीं अनुसूची म शामिल करे जाय जेखर ले छत्तीसगढ़ी ल राष्ट्रीय सम्मान मिल सकै अउ रोजी रोजगार के अवसर मिलै।
एखर पाछु कवि गोष्ठी म वरिष्ठ कवि शत्रुघ्न जैसवानी, अंजनी कुमार तिवारी, बी आर बंजारे, आशीष श्रीवास, डॉ राघवेंद्र दुबे, डॉ विवेक तिवारी, शीतल प्रसाद पाटनवार, दिलीप पांडे अउ जतन केवट अपन काव्य पाठ म छत्तीसगढ़ी के महत्ता ल बखान करिन। काव्य पाठ के आखिरी म जम्मोझन “छत्तीसगढ़ी ल आठवीं अनुसूची म शामिल करौ” के नारा घलो लगाइन।
आयोजन म मुख्य रूप ले दिनेश पांडेय, चेतन तिवारी, अमर चंद केवट अउ मल्हार के गणमान्य नागरिक मनन उपस्थित रहिन।